చిత్రసేనా రతిమంజరుల దృఢసంకల్పం

రతిమంజరి గురువు ఆదేశానుసారం వేకువజామునే నిద్రలేచి, శుచియై, చేతిలో పుష్పమాలిక ధరించి వీధిద్వారము వద్దకు చేరింది. తలుపు తెరవగానే తమ ఇంటి అరుగుపై కనిపించే వ్యక్తినే ప్రాణనాథునిగా స్వీకరించాలన్నది గురూపదేశం. భగవంతుని ప్రార్థిస్తూ ఆమె తలుపులు తెరవగా, అక్కడ ఒక తేజోవంతుడైన విప్రకుమారుడు కనిపించాడు.

ఆ యువకుని దివ్యరూపాన్ని చూసి సంతోషించిన రతిమంజరితో ఆయన సంభాషణ ప్రారంభించాడు. నిన్నటి రాత్రి వాన, చలిబాధల నుండి రక్షించిన ఆ పుణ్యభవనం ఎవరిదని ఆయన ప్రశ్నించాడు. తాను కాశీపురానికి చెందిన గోణికాపుత్రుడనని, కవిరాజుల సభయైన భోజరాజు ఆస్థానానికి వెళ్తున్నానని, తన సహాధ్యాయి అయిన దత్తకుని స్వస్థలం ఇదే కావడంతో రాత్రి ఇక్కడ బస చేశానని తెలిపాడు.

అతని మాటల్లో దత్తకుని ప్రస్తావన రాగానే చిత్రసేన ముందుకు వచ్చింది. దత్తకుడు తన బాల్యమిత్రుడని, తామిద్దరం చిన్నతనంలో కలసి చదువుకున్నామని, అతడినే తన భర్తగా భావిస్తున్నానని తెలిపింది. అనంతరం రతిమంజరి ఏమాత్రం సంకోచించక, తన చేతిలోని పుష్పమాలను గోణికాపుత్రుని మెడలో వేసి పతిగా వరించింది.

అపరిచిత యువతి ఇలా మాల వేయడంతో గోణికాపుత్రుడు మొదట విస్తుపోయాడు. ఇది వేశ్యాగృహమని గ్రహించి, ధనవంతులను ఆకర్షించి సర్వస్వం లాక్కునే కుట్రలో భాగమేమోనని అనుమానిస్తూ వారిని హెచ్చరించాడు. కానీ చిత్రసేన కల్పించుకుని, తాము వేశ్యాపుత్రికలమైనా కులవృత్తిని విడనాడి పతివ్రతా ధర్మాన్ని పాటించాలనే సంకల్పంతో ఉన్నామని వివరించింది.

రతిమంజరి కూడా వినయంతో ఆయన పాదాలపై పడి తమ సదాశయాన్ని నివేదించడంతో, గోణికాపుత్రుడు వారి చిత్తశుద్ధిని గ్రహించి రతిమంజరిని అర్ధాంగిగా స్వీకరించడానికి సమ్మతించాడు. వారిని ఆనందంతో మేడపైకి తోడ్కొని వెళ్లారు.

ఈ విషయం తెలుసుకున్న వారి తల్లి రతినూపుర తీవ్ర కోపంతో రగిలిపోయింది. చక్రవర్తులకు ప్రియురాండ్రై భోగభాగ్యాలు అనుభవించాల్సినవారు, భిక్షాటన చేసే విప్రులను పెళ్లాడటం ఏమిటని నిందించింది. తన మాట వినకపోతే సర్వసంపదలను, ఆభరణాలను ఇక్కడే వదిలి వెళ్ళాలని ఆజ్ఞాపించింది.

దానికి ఆ సోదరీమణులు ఏమాత్రం చలించక, అక్రమంగా సంపాదించిన ధనం తమకు వద్దని చెప్పి, ఒంటిపై ఉన్న నగలను, జరీచీరలను తల్లి ముందే విసర్జించి సామాన్య వస్త్రాలు ధరించారు. వారి త్యాగానికి, ధైర్యానికి అబ్బురపడిన గోణికాపుత్రుడు వారికి కొత్త వస్త్రాలు సమకూర్చాడు. ఆ రాత్రే చిత్రసేనా రతిమంజరులు గోణికాపుత్రునితో కలసి ధారానగరానికి బయలుదేరారు.