హేమావతి, యక్షుల మైత్రీభంగం

దేవేంద్రుని సుధర్మ సభలో నాట్యము చేసే అప్సరసలలో హేమావతి సౌందర్యవతిగా పేరుపొందింది. తారకాసురుడు స్వర్గంపై దాడి చేసి దేవతలను తరిమివేసిన సమయంలో, రాక్షసులు అమరావతిని దోచుకున్నారు. ఆ సమయంలో ఒక కామాంధుడైన రాక్షసుడు హేమావతిని అపహరించి హిమాలయ శిఖరానికి తీసుకువెళ్లాడు. అతని బారినుండి తప్పించుకోవడానికి ఆమె ఉపాయంతో అమరావతిలోని తన సౌధానికి వెళ్దామని నచ్చజెప్పజూచినా, అతడు వినక బలవంతం చేయసాగాడు.

అదే సమయంలో అక్కడ విహరిస్తున్న యక్ష కుమారులైన మణిగ్రీవుడు, జలంధరుడు అక్కడికి వచ్చారు. హేమావతి వారి శరణు కోరగా, వారు ఆమెకు అభయమిచ్చారు. ఆ రాక్షసుడు ఆమె తన భార్య అని వాదించి, యక్షులతో ద్వంద్వ యుద్ధానికి దిగాడు. పరాక్రమవంతులైన ఆ యక్ష మిత్రులిద్దరూ కలిసి రాక్షసుడిని సంహరించి ఆమెను రక్షించారు. ప్రాణరక్షణ చేసినందుకు కృతజ్ఞతతో హేమావతి వారిద్దరినీ ఆదరించింది. ఆమె రూపానికి ముగ్ధులైన ఆ మిత్రులు ఆమెను తమ అలకాపురంలోని క్రీడాసౌధానికి తీసుకువెళ్లి అనురాగంతో కాలం గడిపారు. అనంతరం దేవతలు స్వర్గాన్ని తిరిగి స్వాధీనం చేసుకున్నాక, హేమావతి అమరావతికి చేరగా వారు రహస్యంగా ఆమె వద్దకు రాకపోకలు సాగిస్తుండేవారు.

కొంతకాలం గడిచాక మణిగ్రీవ జలంధరులు భూలోకం నుండి అనంగమోహిని అనే పరమ సుందరిని అపహరించి, హేమావతి అంతఃపురంలో దాచారు. ఈ దుశ్చర్య హేమావతికి నచ్చకపోయినా వారి బలవంతం వల్ల మిన్నకుండిపోయింది. మణిగ్రీవుడు ఒంటరిగా అనంగమోహిని వద్దకు వెళ్లి తనను చేపట్టమని ప్రార్థించాడు. ఆమె మొదట అతని అధర్మ ప్రవర్తనను తీవ్రంగా నిందించినా, బలాత్కారానికి దిగుతాడనే భయంతో యుక్తిని ప్రయోగించింది.

తాను ఏకపత్నీవ్రతం వంటి నిష్ఠ గలదాననని, ఒకే పురుషుని తప్ప మరొకరిని ఆశ్రయించనని ఆమె మణిగ్రీవుడితో పలికింది. విమానంలో తనతో పాటు వచ్చిన రెండో వ్యక్తి దృష్టి మంచిది కాదని, అతనిని ఎన్నడూ తన ఎదుటకు రానివ్వనని మాట ఇస్తేనే అతనికి లొంగుతానని షరతు పెట్టింది. ఆమె మాటలకు పొంగిపోయిన మణిగ్రీవుడు, జలంధరుడు కేవలం తన పరిచారకుడని, అతడిని దరిదాపుల్లోకి రానివ్వనని వాగ్దానం చేశాడు.

ఇంతలో బయట వేచియున్న జలంధరుడు తలుపు తడుతూ, తన వంతు సమయం వచ్చిందని, ఆమెను తనకు అప్పగించమని పిలిచాడు. మణిగ్రీవుడు బయటకు వచ్చి జలంధరుడిని తీవ్రంగా దూషిస్తూ, ఆమె తన ప్రాణేశ్వరి అని, ఇకపై మన స్నేహం చెల్లిందని హెచ్చరించాడు. ఇద్దరూ సమంగా భోగించడానికై తెచ్చిన స్త్రీని ఒక్కడే అనుభవించాలని చూడటం మిత్రద్రోహమని జలంధరుడు వాదించడంతో, ఇద్దరి మధ్య వాగ్వాదం పెరిగి తీవ్రమైన ముష్టియుద్ధంగా మారింది.

ఆ సమయంలో అనంగమోహిని గది తలుపులు గట్టిగా మూసివేసుకుంది. అంతఃపురంలో వారి పోరాటాన్ని చూసిన హేమావతి ఆగ్రహించి, దేవేంద్రునికి ఈ విషయం తెలిస్తే ముప్పు వస్తుందని వారిని వెంటనే బయటకు పొమ్మని గద్దించింది. మణిగ్రీవుడు గట్టిగా కొట్టడంతో గాయపడిన జలంధరుడు పారిపోగా, మణిగ్రీవుడు అతనిని తరుముకుంటూ వెళ్లాడు. హేమావతి వారు తిరిగి రాకుండా ద్వారాలు మూయించి, రక్షణ పొందిన అనంగమోహినిని ఓదార్చడానికి గది వద్దకు వచ్చింది.