విక్రమసింహుని సాహసయాత్ర - పురుషద్వేషిణి కథ

చోళదేశంలోని ప్రజావతి నగర రాజైన చిత్రసేనునికి విక్రమసింహుడు, ఆయన మంత్రి శ్రుతకీర్తికి బహుశ్రుతుడు జన్మించారు. వారిద్దరూ సకల శాస్త్రాలలోనూ, అస్త్రవిద్యలలోనూ అసమాన ప్రజ్ఞావంతులుగా ఎదిగారు. వృద్ధుడైన చిత్రసేనుడు రాజ్యభారాన్ని కుమారునికి అప్పగించాలని భావించగా, పాలనా బాధ్యతలు చేపట్టేముందు దేశసంచారం చేసి లోకానుభవం సంపాదించాలని మిత్రులిద్దరూ బయలుదేరారు.

సంచార క్రమంలో వారు ఒక సత్రానికి చేరుకున్నారు. అక్కడ సింహద్వారంపై ఉన్న ఒక సుందరీమణి చిత్రపటాన్ని చూసి విక్రమసింహుడు పరవశుడై, ఆమెను వివాహం చేసుకోకపోతే ప్రాణాలు విడుస్తానని పలికాడు. ఆ పటాన్ని చిత్రించిన విపుణికుడనే చిత్రకారుని ఆచూకీ తీసి వారు అనంతపురం వెళ్ళారు. కాశీలో మణికర్ణికా ఘట్టం వద్ద 'పురుషద్వేషిణి' అనే రాజపుత్రికను జలస్తంభన విద్యతో చూసి, సాముద్రిక శాస్త్ర ప్రావీణ్యంతో ఆమె రూపాన్ని చిత్రించానని అతడు వారికి తెలిపాడు.

ఆమెను వెతుకుతూ సాగుతుండగా మార్గమధ్యంలో తీవ్రమైన ఎండకు అలసిన విక్రమసింహుడు ఒక చెట్టునీడన విశ్రమించాడు. బహుశ్రుతుడు దాహార్తితో ఉన్న మిత్రుని కోసం నీరు తేవడానికి సమీపంలోని కొలనుకు వెళ్ళాడు. అక్కడ 'ఇది పురుషద్వేషిణి కేళీసరోవరం, పురుషులు వస్తే మరణశిక్ష' అని రాసి ఉన్న ఫలకాన్ని చూసి ఆనందాశ్చర్యాలతో నీరు తీసుకుని తిరిగివచ్చాడు. ఈలోగా చెట్టు వద్దకు ఒక సింహం రావడంతో భయపడిన విక్రమసింహుడు పైకెక్కాడు. అక్కడ విశ్రమిస్తున్న క్రౌంచపక్షి రెక్కలలో అతడు చిక్కుకుపోగా, అది రివ్వున ఎగిరి సుదూర క్రౌంచద్వీపానికి చేర్చింది.

క్రౌంచద్వీపంలో రాక్షస ప్రవృత్తి గల స్త్రీలు, వికార రూపాలు కలిగిన పురుషులు ఉండేవారు. విక్రమసింహుని సౌందర్యానికి ముగ్ధులైన ఆ దీవి రాణి క్రౌంచవతి, ఇతర స్త్రీలు అతని సాంగత్యంతో సుందర సంతానాన్ని పొందారు. విక్రమసింహుని పలుకుబడి పెరిగిపోవడంతో అసూయ చెందిన స్థానిక పురుషులు ఒక రాత్రి అతడు నిద్రిస్తుండగా మంచంతో సహా సముద్రంలో పారవేయడానికి తీసుకెళ్ళారు. అతడు యుక్తిగా చెట్టుకొమ్మను పట్టుకుని తప్పించుకోగా, అదే చెట్టుపై ఉన్న మునుపటి క్రౌంచపక్షి అతన్ని తిరిగి జంబూద్వీపంలోని పాత స్థానానికే చేర్చింది.

అక్కడ ఏడాదిపాటు మిత్రుని కోసం నిరీక్షిస్తున్న బహుశ్రుతుడు విక్రమసింహుని కలుసుకున్నాడు. ఇద్దరూ కలిసి ఆ కేళీసరోవరం వద్దకు చేరి చెట్టుపై దాగి చూడగా, పురుషద్వేషిణి తన చెలికత్తెలతో కలిసి అక్కడికి వచ్చింది. తాను పురుషులను ద్వేషించడానికి గల కారణాన్ని చెలులు ప్రశ్నించగా, గతజన్మలో తన భర్త జూదరియై ధనం కోసం తనను బావిలో తోసి, ఆ తర్వాత నిద్రపోతుండగా గొంతుకోసి చంపిన రత్నాంగి వృత్తాంతాన్ని ఆమె వివరించింది.

ఆమె మనస్తత్వాన్ని గ్రహించిన బహుశ్రుతుడు ఒక ఉపాయం పన్నాడు. పురుషద్వేషిణి ఉండే నగర సమీపంలో నూతన నగరాన్ని నిర్మించి, విక్రమసింహునికి 'వనితాద్వేషి' అని పేరుపెట్టి రాజుగా ప్రకటించాడు. వనితాద్వేషి కేళీసరోవరానికి వెళ్ళే సమయంలో స్త్రీలు ఎవరూ బయటకు రాకూడదని నిబంధన విధించాడు. రెండు నగరాల ప్రజలు పడుతున్న ఇబ్బందులను చూసి అక్కడి మహారాజు వనితాద్వేషిని తన సభకు ఆహ్వానించాడు.

రాజసభలో విక్రమసింహుడు మాట్లాడుతూ.. గతజన్మలో తన భార్య రత్నాంగి తన ధనాన్ని దుర్వ్యయం చేసి, తనను బావిలో తోసి, చివరకు నిద్రలో గొంతు కోసి చంపిందని, అందుకే ఈ జన్మలో స్త్రీద్వేషిగా మారానని పురుషద్వేషిణికి వినపడేలా చెప్పాడు. చాటునుండి వింటున్న ఆమె ఆగ్రహంతో సభలోకి వచ్చి, తప్పు చేసినవాడివి నీవేనంటూ వాదానికి దిగింది. ఇద్దరి వాదనలు విన్న బహుశ్రుతుడు, గతజన్మ వైరాలను పక్కనపెట్టి ఈ జన్మలో దంపతులుగా కలిసి జీవించడమే సరైన పరిష్కారమని సూచించాడు.

విక్రమసింహుని రూపచాతుర్యాలకు ముగ్ధురాలైన పురుషద్వేషిణి ఆ ప్రతిపాదనకు అంగీకరించింది. రాజు ఎంతో వైభవంగా వారికి వివాహం జరిపించాడు. అనంతరం విక్రమసింహుడు భార్యతో, మిత్రునితో కలిసి స్వదేశానికి తిరిగివచ్చి, తండ్రి ఆశీస్సులతో పట్టాభిషిక్తుడై రాజ్యాన్ని ధర్మబద్ధంగా పాలించాడు.