కరభ శరభుల కథ

భట్టపాదుడనే గురువు వద్ద కరభుడు, శరభుడు అనే ఇద్దరు శిష్యులు ఉండేవారు. వారికి చదువు అబ్బక ఇబ్బంది పడుతుండేవారు. ఒకరోజు కామగ్రీవుడనే వృద్ధ బ్రాహ్మణుడు ఇంద్రజాలము, పరకాయప్రవేశము అనే విద్యలను సంపాదించి, సంతానం కోసం గురువుగారి కుమార్తెను వివాహం చేసుకోవాలని కోరగా గురువు తిరస్కరించాడు. ఈ విషయాన్ని రహస్యంగా విన్న శరభుడు కరభుడికి చెప్పి, తాము ఆ కామగ్రీవుడిని ఆశ్రయిస్తే ఆ విద్యలను పొందవచ్చని నచ్చజెప్పాడు.

ఇద్దరూ గురుకులము నుండి పారిపోయి కామగ్రీవుడిని కలిశారు. తాము అతనికి వివాహం చేయిస్తామని నమ్మబలికి అతని వెంట తిరగసాగారు. ముగ్గురూ దేశాటన చేస్తూ వివాహ ప్రయత్నాలు చేసినప్పటికీ వృద్ధుడైన కామగ్రీవుడికి ఎక్కడా వివాహం కుదరలేదు. చివరకు కామగ్రీవుడికి ఆసన్న మరణ సమయం రాగా, అతను ఇక తనకు వివాహం కాదని గ్రహించి కరభ శరభులకు ఆ రెండు విద్యలను చెరియొకటి ఉపదేశించి ప్రాణాలు విడిచాడు.

ఆ విద్యలను పొందిన తర్వాత వారిద్దరూ తమకు వచ్చిన విద్యలను మార్చుకోవాలని అనుకున్నారు. ఒకరికొకరు విద్యలను ఇచ్చిపుచ్చుకున్నారు. ఒక పట్టణానికి వెళ్ళినప్పుడు అక్కడి రాజు వ్యాధిగ్రస్తుడై ఉన్నాడని తెలుసుకుని, పరకాయప్రవేశం ఉన్నవాడు రాజు దేహంలోకి ప్రవేశించి రాజ్యం ఏలవచ్చని ఒకరు భావించి తిరిగి విద్యలను మార్చుకున్నారు. అయితే రాజు కోలుకుని ఇంద్రజాల వినోదం చూడాలని కోరడంతో ఇంద్రజాలం ప్రదర్శించి ధనం సంపాదించారు.

ఆ ధనాన్ని చూసి మళ్ళీ ఇంద్రజాల విద్యపై మోజు కలిగి మరలా విద్యలను మార్చాలని కలహించుకున్నారు. వారి మధ్య పరస్పర నమ్మకం నశించి శత్రుత్వం పెరిగింది. ఒకరిని ఒకరు మోసగించుకోవడానికి సమయం కోసం చూస్తుండగా, ఒకరోజు అరణ్యంలో ప్రయాణిస్తున్నప్పుడు కరభుడు తన ఇంద్రజాలంతో ఒక మాయా నగరమును, అందులో మరణావస్థలో ఉన్న రాజును సృష్టించాడు.

ఆ దృశ్యాన్ని నిజమని నమ్మిన శరభుడు తన పరకాయప్రవేశ విద్యతో ఆ మాయా రాజు శరీరంలోకి ప్రవేశించాడు. ఆ సమయంలో కరభుడు శరభుని నిజ శరీరానికి తాళ్ళు కట్టి చెట్టుకు తలక్రిందులుగా వేలాడదీశాడు. మాయ తొలగిపోగానే శరీరం లేక శరభుడు తీవ్రంగా బాధపడి, తన నిజ శరీరంలోకి చేరి కరభుని మోసాన్ని గ్రహించాడు. ఇంద్రజాలం వల్ల తాను మోసపోయానని భావించి శరభుడు అక్కడి నుండి మరొక ప్రాంతానికి వెళ్ళిపోగా, కరభుడు తన ఇంద్రజాల ప్రదర్శన కోసం రత్నాకరం అనే నగరానికి చేరుకున్నాడు.